Fréttir

Tilboð um kaup á hlutafé í Plastprenti hf.

Stjórnendur Plastprents hf. hafa um nokkuð skeið unnið að fjárhagslegri endurskipulagningu félagsins í samvinnu við viðskiptabanka þess og helsta lánveitanda, Landsbankann, með það að markmiði að vernda þau verðmæti sem liggja í starfsemi félagsins og þau störf sem félagið skapar.

Vestia er í dag stærsti eigandi Plastprents hf. með 71,98% eignarhlut. Eignarhlut sinn eignaðist Vestia í desember 2009 með kaupum Landsbankans á hlutafjáreign stærstu hluthafa í félaginu, en sá eignarhlutur var síðar framseldur til Vestia. Sem hluta af fjárhagslegri endurskipulagningu félagsins og í aðdraganda hluthafafundar sem boðaður hefur verið 6. ágúst, hefur Vestia sent hluthöfum Plastprents tilboð um kaup á öllu eftirstandandi hlutafé félagsins. Tilboð Vestia til hluthafa nú er það sama og stærstu hluthafar fengu í desember 2009 og þannig tryggt að allir hluthafar Plastprents sitji við sama borð.

Að fjárhagslegri endurskipulagningu lokinni mun Plastprent vera sett í formlegt og opið söluferli. Upplýsingar um söluferlið þegar að því kemur sem og upplýsingar um eignarhald Vestia á hlutafé í öðrum atvinnufyrirtækjum eru aðgengilegar hér á vefsvæði félagsins.